Արսենալ 0-0 Չելսի

Այս խաղն ինձ հիշեցրեց Մոուրինյոի մադրիդյան ժամանակաշրջանի Կլասսիկոները․ մրցակիցը վերահսկում է գնդակն ու փորձում ստեղծագործել դաշտի կենտրոնում, իսկ Մոուրինյոի տղաները հագեցնում են դաշտի կենտրոնը՝ փորձելով ավելի շատ խանգարել մրցակցին, քան ստեղծել սեփական խաղը։ Արդյունքում Չելսին ուներ արագ ու վտանգավոր հակագրոհների հնարավորություն, բայց Մերտեսակերի փայլուն դիրքային խաղը (եթե մինչ այս մրցաշրջանը լսեի Մերտեսակերի փայլուն դիրքային խաղ արտահայտությունը, պարզապես կժպտայի) և Վոլլկոտի արաջ նահանջը սպանում էին Ազարի եզրային խաղը, ինչի արդյունքը եղավ 32-րդ րոպեին Ազարի փափուկ փոխանցումը կենտրոնով և Լեմպարդի կողմից վերին դարպասաձողի ստուգումը։
36-րդ րոպե, և չնշանակված 11 մետրանոց արդեն Չելսիի դարպասի մոտ։
2-րդ խաղակեսում վտանգավոր դրվագների քչությունը չազդեց խաղի լարվածության վրա ու Մոուրինյոն կարողացավ չպարտվել Վենգերին 10-րդ անգամ։

Վիլաշ Բոաշը հեռացավ,ավելի ճիշտ հեռացվեց.

Անգլիայում բոլորը բռնցքամարտիկ են  ուժեղ թե թույլ.Սակայն  համարյա բոլոր հարվածները այս տարի ընդում էր պարոն Բոաշը. Եվ ինչպես սպասելի էր նա հեռացավ.
  Երկրորդ <<Յուրահատուկ>>-ը  կարիերան սկսեց <<Պորտու>>-յում.  Բոլորն էլ նորմալ ընդունեցին Բոաշին և նրա մեջ միակ առանձնահատուկ բանը այն էր ,որ եղել էր առանձնահատուկի օգնականը.Սակայն երբ սկսվեց մրցաշրջանը բոլորը հասկացան ,որ Բոաշը լավ է յուրացրել Մոուրինյոյի դասերը.
  Մոտենում էր մրցաշրջանի կարևորագույն խաղը Պորտուգալական <<Էլ Կլասիկոն>>.  <<Բենֆիկա>>-յի հետ խաղում Բոաշի թիմը խաղաց լավագույն խաղը նրա ղեկավարությամբ .Ով կմտածեր որ Բոաշի թիմը հինգ անպատասխան գնդակ կուղարկի <<արծիվների>>  դարպասը. Բոաշը գոհ էր տղաների  խաղից, իսկ մարզադաշտ վանկարկում էր<<Vilas Boas. TWO SPECIAL ONE>>.Սրանից Բոաշը ոգևորվեց և որոշեց կրկնել  Մոուրի սխրանքը.Ստացվեց մասամբ .<<Պորտուն>> և իր մարզիչը նվաճեցին փոքր Եվրոպան.Առաջնության ավարտից մի քանի տուր առաջ <<Պորտու>>-ն նվաճում ունեցավ նաև սեփական արայում. <<Պորտու>>-ն նվաճեց  երկրի չեմպիոնի տիտղոսը <<Բեենֆիկա>>-յից միավորների ահռելի հեռավորության վրա.Եվ մի օր Բոաշը զանգ ստացավ .Մի այլազգի  տղամարդ կոտրատված անգլերենով նրան հարցրեց
 _Ցանկանում եք մարզել <<Չելսի>>-ն?
 Պատասխանը եղավ <<Այո>>.Իհարկե .Հիմարություն կլիներ մերժել Աբրային.Եվ Բոաշը մի լավ Պորտուգալիային ցտեսության խոսքեր նվիրելուց հետո ժամանեց Լոնդոն. Եվ Եվրոպան խելագարվեց .Յուրահատուկ  2-ը ծնվեց .
 Սակայն պարզվեց որ ոչ բոլորս ենք Վանգա կամ Նաստրադամուս.Դեռ Վիլաշի ժամանակը չէր .Դժվար բան է փոխարինել Անչիին .Սակայն Բոաշը գնաց այդ քայլին.
    Սկզբում պարտությունները լուրջ չէին ընդունվում .Սակայն հետո պարտությունները շարունակվելով վերածվեցին մի յուրահատուկ ֆուտբոլային <<Սանտա Բարբարա>>-յի.Երկպագուների  համբերության բաժակը լցվեց .Աբրան դեռ համբերում էր ......
Սակայն Աբրան էլ քարից չէ.<<Նապոլի>>-ի հետ խաղից հետո այն նույն ձայնը հարցրեց .
_Ցանկանում եք այլևս չմարզել <<Չելսի>>-ն .
 Պատասխանը եղավ <<Այո>> .Աբրային մերժելը դժվար է.....Բոաշը հեռացավ Լոնդոնից.
   Հեռացավ ,սակայն վերադարձավ .Վերադարձավ լոնդոնյան մյուս ակումբ  <<Թոթենհեմ>>.   Սկսեց ոչ այնքան վատ  .<<Թոթենհեմը>> նորմալ դիրք ուներ աղուսյակում և երբեմն  հաղթում էր գրանդներին.Սակայն այս տարի  դժոխային սկսվեց . Թիմը պարտվում էր շատ ,իսկ աղյուսակում ուղակի սլանում էր դեպի հատակը.Հեռացման մասին առաջին լուրը ստացվեց <<Յունայթեդ>>-ի հետ խաղից անմիջապես առաջ.Եվ թիմը խաղաց մարզչի համար և առաջին անգամ  նորմալ  խաղ ցուցադրեց. Թվում էր թե......Սակայն......
Անգլիայում բոլորը բռնցքամարտիկ են  ուժեղ թե թույլ.Սակայն  համարյա բոլոր հարվածները այս տարի ընդում էր պարոն Բոաշը. Եվ ինչպես սպասելի էր նա հեռացավ.
 Նա այժմյան ֆուտբոլային աշխարհի աբսուրդն է .Անշուշտ ունի պոտենցիալ սակայն օգտագործել այն կարծես անկարող է. Սակայն չլինենք հոռետես և հավատանք նրա հաջողությանը չէ որ նրան ուսուցանել է նույն ինքը Ժ.ՄՈՈՒՐԻՆՅՈՆ.

Մանչեստեր Սիթի 6-3 Արսենալ

    Արսենալի առաջատարությունն ու Սիթիի հավաքած թափը առիթ էին տալիս համարել այս խաղը չեմպիոնության երկու հիմնական թեկնածուների ուժերի հակամարտություն։
    Արսենալի երկարատև դիրքային գրոհների ժամանակ վառ ընդգծվում էր Պելլեգրինիի ձեռագիրը․ երկու խիտ գծով պաշտպանվող 8 ֆուտբոլիստներ և բոլորից կտրված Ագուերո ու Նեգրեդո, որոնց փնտրում էին երկար փոխանցումներով, իսկ հարձակվողները հարվածի պահ չգտնելու դեպքում գրոհին միացնում էին արագ եզրերը և չհոգնող Տուրեին։
    32-րդ րոպեին Ուոլլկոտի խփած գնդակը ևս մեկ անգամ ապացուցեց, որ 40 միլիոնանոց Ֆերնանդինյոն չի կորաղանում ցեմենտել խորքից միացող գրոհները, իսկ Յայա Տուրեն, թեև հանճարեղ խաղ է ցուցադրում, ինչը երևաց մասնավորապես Սիթիի 2-րդ գոլի ժամանակ, հաճախ մոռանում է պաշտպանական ֆունկցիաների մասին։
  Միայն այն փաստը, որ հանդիպումը կայանալու էր Սիթիի հարկի տակ, կասկած չէր թողնում, որ հենց «քաղաքայիններն» են հանդիպման ֆավորիտը, և հենց վերջիններս էլ, առաջին րոպեներից ինտենսիվ պայքարի անցնելով, արդեն 13-րդ րոպեին հաղթում էին 1-0 հաշվով․ անկյունայինի արդյունքում գեղեցիկ հարվածով խաղի հաշիվը բացեց Ագուերոն, ով փայլուն մարզավիճակում է գտնվում և նույնիսկ չկենտրոնանալով 11 մետրանոցի նշակետի շրջակայքում՝ հանդիսանում է իր թիմի հարձակման առաջատարը։
    Եվս մեկ սխալ 51-րդ րոպեին, և քաղաքայինները հաղթում էին 3-1։ Այդ վայրկյանից ի վեր կասկած չմնաց, որ Վենգերի թիմը կպարտվի այսօր, և նույնիսկ Ուոլլկոտի երկրորդ գոլը չհասցրեց ինտրիգ մտցնի խաղի մեջ։
    Չեմպիոնական դիմակայությունը ցույց տվեց, որ Սիթին ահռելի պոտենցիալ ունի, որի իրագործման դեպքում, Պելլեգրինին կհաղթի ոչ միայն Անգլիայի առաջնությունը, այլև Չեմպիոնների լիգան, իսկ Արսենալը, ցուցադրելով շատ հարմոնիկ խաղ առջևի գծում, ունի ուժեղ հենակետայինի կարիք, քանի որ Ֆլամինին չունի չեմպիոնական ամբիցիաներին համապատասխան տվյալներ։
    Արդյունքում 6-3` Սիթին ուժեղ է ուղիղ երկու անգամ, և լոնդոնցիների առավելությունը մրցակիցների նկատմամբ կրճատվեց 3 միավորով։

Հայկական «շաբաթօրյակ»

    23 նոյեմբերի 2013՝ Ռուսաստանում ու Գերմանիայում կարևորագույն խաղային օր․ նախ ԲԿՄԱ-Սպարտակ, ավելի ուշ Բորուսսիա Դորտմունդ-Բավարիա, «հայերենով» ասած՝ Յուրան ու Արազը, հետո էլ Հենոն։

    ԲԿՄԱ-Սպարտակ

Ռուսական կլասսիկո, որն իր լարվածությամբ հիշեցնում է Ռոմա-Լացիո հռոմեական դերբիին, որովհետև անկախ թիմերի զբաղեցրած դիրքերի, խաղը կարևորագույնն է ողջ առաջնության կտրվածքով, իսկ ռուս երկրպագուների աննորմալ ֆանատիզմը ապահովում է մասս-մեդիաների ուշադրությունը խաղից դուրս մթնոլորտին։ Այս ամենից բացի մեզ անկասկած ավելի շատ հետաքրքրում է մերոնց ցուցադրած խաղի որակը։ Հատկապես Յուրային հետևենք մեծուշադրությամբ, քանի որ մինչ այս մրցաշրջանը այնպիսի տպավորություն կար, որ մեր հարձակվողի չի կարողանում իրեն լավ դրսևորել ուժեղ մրցակիցների դեմ, և ահա հիմա, երբ Մովսիսյանը հասել է կարծես իր կարիերայի ապոֆեոզին, կերևա և՛ Յուրայի, և՛ այժմյան Սպարտակի, և՛ Կարպինի իրական մակարդակը։

    Բորուսսիա Դորտմունդ-Բավարիա

Անկեղծ ասած չեմ ուզում շատ խոսել այս դիմակայության մասին ու գովել Մխիթարյանի խաղը, բայց Դորտմունդի մարզադաշտում տիրող աննկարագրելի տրամադրությունը չի կարող չխանգարել նույնիսկ Բավարիային, իսկ այն արագությունը, որով Մխիթարյանը ներգրավվեց Կլոպպի խաղում ու լիարժեք փոխարինեց Գյոթցեին, հուսադրում է Բորուսսիայի երկրպագուներին, որ, նույնիսկ ներկա ոչ իդեալական իրավիճակում, վաղվա խաղը կարող է դառնալ շրջադարձային առաջնության հետագա ընթացքում։

ԲԿՄԱ-ն վերադառնում է

    Առաջնության նախորդ 5 տուրերի ընթացքում ընդհամենը մեկ միավոր վաստակած «բանակայիններն» այսօր հյուրընկալեցին Կրասնոդարին, որը վաստակած 24 միավորով հանգրվանել էր 4-րդ հորիզոնականում ու առաջ էր մայրաքաղաքը ներկայացնող մրցակցից 3 հորիզոնականով։ Կրասնոդարյան ակումբի օգտին էր թվում նաև այն փաստը, որ ԲԿՄԱ-ի հենակետայիններից հիմնական կազմում հայտնվել էր միայն Միլանովը, ով ավելի շուտ կենտրոնական է, ոչ թե հենակետային, և Սլուցկու ընտրած կազմը գերհարձակվողական էր․ Հոնդան, Վիտինյոն, Տոշիչը, Մուսան և Դումբիան խաղը սկսեցին մեկնարկային կազմում։
    Ու այդ մարտավարությունն աշխատեց․ արդեն 40-րդ րոպեին խաղի հաշիվը 4-0 էր հօգուդ «բանակայինների»։ 2 անգամ Իգնաշևիչի խորքից կատարված գերազանց փոխանցումները եզրափակեց Տոշիչը, մի անգամ էլ Դումբիան դուրս բերեց սերբ եզրայինին դարպասի դիմաց, ու Զորանը ձևակերպեց հեթ-տրիկ՝ ապահովելով Սլուցկու համար հանգիստ 2-րդ խաղակես։
    Ճիշտ է՝ նույնիսկ այս հաղթանակից հետո «բանակայինները» զիջում են Զենիթին 11 միավոր, բայց մինչ առաջնության վերջ էլ դեռ կեսից ավելին կա․․․

Բարսելոնա 2-1 Ռեալ Մադրիդ

    Տատա Մարտինո 1-0 Կարլո Անչելոտտի։ Նկատենք, որ երկու գլխավոր մարզիչների համար էլ սա առաջին Կլասսիկոն էր, բայց եթե Մարտինոն պարզապես փորձում է կատարելագործել կատալոնացիների խաղը, ապա Անչելոտտին կառուցում է նոր թիմ, ինչը շատ լավ երևաց խաղի առաջին կեսում․ Կրկին զգացվեց Բեըլ-Դի Մարիա-Ռոնալդո եռյակի համագործակցության՝ ոչ այնքան արդյունավետ լինելը:ԵՎ կարծես Ռամոսին հենակետայինի դիրքում օգտագործելը իտալացի մասնագետի հերթական սխալն էր, այդ պատճառով էլ Ռամոսը փոխարինվեց, քանզի բազում մանր խախտումների հանրագումարոը ի վերջո կարող էր հանգեցնել կարմիր քարտի։ Առաջին 45 րոպեներն ավելի լավ անցկացնելով՝ Բարսան գնաց ընդմիջման նվազագույն առավելությամբ՝ Նեյմարի հարվածի ու Վարանի ձեռքի շնորհիվ։
    Երկրորդ խաղակեսում խաղը լիովին հավասար ընթացավ։ Դաշտ դուրս եկած Ալեքսիսի սուպեր գոլին էլ մադրիդցիները պատասխանեցին խաղավերջում խեսեի խփած գոլով:
    Բավականին միապաղաղ անցած Կլասսիկոն պատասխանեց բազում հարցերի։ 90 րոպեները  ցույց տվեցին, որ 1․Կառվախալը լիովին պատրաստ է փոխարինել Արբելոային
                               2․ Դաշտի կենտրոնում  մեծ ընտրության առկայության պայմաններում նույնիսկ, Անչելոտտին  լուրջ խնդիրների է հանդիպում Ալոնսոյի բացակայության պայմաններում:
                               3․ Բենզեման՝ չնայած վատ մարզավիճակին, անհրաժեշտ է, որպեսզի եզրերում Ռոնալդուն ու Դի Մարիան ստանան մի փաքր ազատություն։ Որպես այլընտրանք կարելի է փորձարկել Մորատային, ով ունի բարձրակարգ ֆուտբոլիստի նախանշաններ...
     Ինչ վերաբերում է Խերարդո Մարտինոյի սաների ցուցադրած խաղին, պետք է նշել, որ <<Բարսան>> խաղաց չափազանց ինքնավստահ՝ այս խաղին մոտենալով կարծես Լա Լիգայի շարքային տուրի:
    Վերջում նկատենք, որ ինչպես ստացվում է վերջին տարիների Կլասսիկոների ժամանակ, Բարսայի աստեղային նորեկը՝ ով այս դեպքում Նեյմարն էր, նորից դարձավ գոլի հեղինակ իր առաջին Կլասսիկոյում, իսկ Մարտինոն կարողացել է լիովին հասկանալ ֆուտբոլիստներին, վերջիններս էլ՝ իրենց մարզչին։ Մի խոսքով՝ <<Բարսան>> գերազանցեց <<Ռեալին և վստահ ու արժանի հաղթանակ տարավ:

Ռոման անկասելի է

    Իտալիայի Ա սերիայի 8-րդ տուրը բացվեց տուրի կենտրոնական՝ Ռոմա-Նապոլի խաղով։ Կարծում եմ՝ նույնիսկ իտալական ֆուտբոլի մշտական քննադատները չէին կարող անտարբեր մնալ այս խաղի հանդեպ․ գերլարված հանդիպումը մեկնարկային սուլիչից սկսած երկրպագուներին մեծ հիացմունք պարգևեց։

    Նախ անդրադառնանք <<Նապոլիին>>. չնայած պարտությանը, վերջիններս վատ տպավորություն չթողեցին, սակայն անհրաժեշտ է ուշադրություն դարձնել մի կարևոր հանգամանքի վրա. նեապոլցիների մեկնարկային կազմում բացակայում էին երկու առաջատարները՝ Իգուայինն ու Զունիգան: Արդեն երրորդ դեպքն է, երբ <<Նապոլին>> փորձում է Չեմպիոնների լիգայից առաջ հանգիստ տալ առաջատարներին: Եթե միջակ թիմերի դեմ խաղում այս տարբերակը կարող է աշխատել, ապա առաջնության առաջատարի դեմ խաղում՝ հազիվ թե... Նույնիսկ իտալական ֆուտբոլի առաջատար <<Յուվենտուսն>> իրեն նման <<ճոխություն>> թույլ չի տալիս: Իսկ Իգուայինի մարզավիճակը՝ չնայած վնասվածքի բուժվելուն, դեռ հեռու է իդեալականից։ Արդյունքն էլ եղավ տրամաբանական պարտությունը՝ մեծագույն ոգևորվածությամբ խաղացող մրցակցից: Միրալեմ Պյանիչի որակյալ խաղը, միավորվելով հավասարակշռված կազմի հետ, ապացուցեց, որ կարող է պայքարել առաջին հորիզոնականի համար։  Թեև անկեղծ լինենք ու ասենք, որ ջալորոսների բախտը մի փոքր ժպտաց, սակայն չի կարելի ասել, որ վերջիններս հաղթանակի արժանի չէին, և Բենիտեսը <<Նապոլիի>> պարտության համար միայմ իրեն կարող է մեղադրել: 2-0, և <<Ռոման>> շարունակում է առաջ ընթանալ առանց միավորների կորստի։

Անհավանական ոչինչ չկա․ Հայեեեեե՛ր

Մենք հաղթում ենք իտալացիներին + Բուլղարիա-Չեխիա ոչ ոքի + Մալթան չի պարտվում Դանիայում + հոլանդացիները թույլ չեն տալիս Թուրքերին հաղթել + Ռումինիան էլ չի կարողանում հաղթել էստոնացիներին + խորվաթները չոն հաղթում Շոտլանդիայում։ Ընդ որում, եթե Շոտլանդիա-Խորվաթիան ավարտվում է ոչ ոքի, մենք ստիպված կլինենք հաղթել Նեապոլում 4 գոլի տարբերությամբ

    

Անհավանական ոչինչ չկա

«Ինտեր» 0-3 «Ռոմա»․ Տոտտի...

 
    <<Ռոման>> հաղթում է Տոտտիի գոլերի շնորհիվ. արդեն շուրջ քսան տարի շարունակ մեկնաբանները կրկնում են այս արտահայտությունը... Իր հերթին՝ <<Ռոմայի>> առաջատարը շարունակում է փայլել ու ապացուցել, որ դեռ կարող է խաղալ, ընդ որում՝ ամենաբարձր մակարդակով: Կարծում եմ, որ Իտալիայի առաջնության հետևողները կհամաձայնեն՝ միակ թիմը, որն  այս պահին արժանի է չեմպիոնությանը՝ <<Ռոման>> է: Մնում է միայն սպասել ու հաջողություն մաղթել <<ջալորոսսիներին>>
               Առա՛ջ <<Ռոմա>>, Առա՛ջ Տոտի... 

Ադնան Յանուզայ՝ Յունայթեդի միակ խաղացողը

    Ընդհամենը մի քանի շաբաթ առաջ ֆուտբոլային լայն հանրությանը անհայտ այս տղան այսօր առաջին անգամ հնարավորություն ստացավ հանդես գալ Մանչեստեր Յունայթեդի հիմնական կազմում, ու ․․․․
     Նախ փորձենք հասկանալ՝ ով է այս տաղանդաշատ տղան։ Ծնվելով Բրյուսելում 1995 թվականին ալբանա-կոսովացի գաղթականների ընտանիքում՝ Ադնանն արդեն 10 տարեկանում դարձավ բելգիական ֆուտբոլի գրանդ Անդերլեխտի մանկապատանեկան թիմի անդամ։ Բելգիական ֆուտբոլի զարգացման հետ միաժամանակ զարգանում էին նաև երիտասարդի խաղային որակները, ինչը աննկատ չմնաց Սեր Ալեքս Ֆերգյուսոնի կողմից, և 16-ամյա եզրային կիսապաշտպանը տեղափոխվեց մանկուենական ակումբ։ Ողջ առաջին տարում Ադնանը դաշտ դուրս եկավ միայն Ֆերգյուսոնի հրաժեշտի խաղին, այն էլ 18 րոպեով, բայց եկավ Մոյեսը, Ադնանն էլ դարձավ պատրաստ դաշտ դուրս գալուն ու երիտասարդ բելգիացին սկսեց ստանալ որոշակի խաղաժամանակ, իսկ այսօր՝ առաջնության հետնապահ Սանդերլենդի հետ խաղին, հիմնական կազմի հայտացուցակում հայտնվեց Ադնան Յանուզայ անունը ու ․․․․
    Ողջ խաղի ընթացքում իրեն ակտիվորեն դրսևորած եզրայինը լավագույնն էր երկու թիմերի կազմում էլ, ու ինչ մեծ եղավ ուրախությունս այն պահին, երբ արդեն սկսել էի գրել մեր հերոսի մասին նյութն, ու հանկարծ վերջինս դարձավ դուբլի հեղինակ՝ կամային հաղթանակ պարգևելով իր թիմին։

    Ադնա՛ն Յանուզա՛յ․ հիշեք այս անունը ու գրանցեք ևս մի բելգիացի աստղի ծագումն․․․

Արսենալ 2-0 Նապոլի

    Բենիտեսի գլխավորությամբ լուրջ մրցակցի դեմ առաջին արտագնա խաղը ի ցույց դրեց բոլոր այն հնարավոր խնդիրները, որոնք կարող են ի հայտ գալ թիմի խաղում՝ մասնավորապես պաշտպանության ու հենակետային գոտու համագործակցության ժամանակ՝ խաղային պատկերը 5 պաշտպանից 4-ի անցնելու դեպքում։ Եվ եթե մինչ այս խաղը կարող էր թվալ, որ այդ խնդիրները շրջանցել են նեապոլցիներին, այսօր հստակ երևաց, որ արագ «հակագրոհների» ժամանակ շվեյցարացի հենակետայիններից մեկը մոռանում էր պաշտպանության մասին, իսկ մյուսը խաղում էր կենտրոնական պաշտպանների հետ մի գծով, ինչի արդյունքում մոռացության է մատնվում խորքից միացող ֆուտբոլիստը, ու հենց այդպես խփվեց առաջին գոլը։ Իսկ հակագրոհները չակերտներում են, քանի որ Նապոլիի կատարմամբ գրոհները իսպառ բացակայում էին, ինչը բացառում է Արսենալի ակտիվ գործողությունները հակագրոհ որակելու մեր սուբյեկտիվ իրավունքը։ Հարձակման կենտրոնում էլ Հիգուաինի բացակայությունը դարձնում էր իտալացիների սակավաթիվ գրոհները անատամ։
    Իսկ Արսենալը, հավաքելով այս մրցաշրջանում գերխաղացված կազմ, կարողացավ իր ֆիրմային կարճ փոխանցումներով խաղը ցուցադրել ու 15-րդ րոպեի դրությամբ 2 գոլի առավելություն ստանալ։ Վենգերը կարծես վերջապես ստացել է հնարավորություն պահպանել իր լավագույն կադրերին ու ստեղծել մի իրավիճակ, որի ժամանակ թիմում չի լինի մի հիմնական ռմբարկու, ինչը վենգերյան փիլիսոփայության հիմնամեխն է։

                     
                   Մադրիդի  <<Ռեալ>>. վատնված միլիոններ

Իսպանիայի առաջնության 7-րդ տուրում երեկ կայացավ մադրիդյան դերբին. <<Ռեալն >> ընդունեց <<Ատլետիկոյին>>: Արքայական ակումբն այս խաղում, մեղմ ասած չտպավորեց: Արդյունքն էլ եղավ վերջինիս պարտությունը նվազագույն հաշվով: Փորձենք պարզաբանել <<Ռեալի>> պարտության պատճառները.
     1. ձախողվեց պաշտպանության կենտրոնը: Ռամոսն ու Պեպեն կարծես ոչ թե 2 փորձառու պաշտպաններ, այլ նորեկներ լինեին և պատահական չէ, որ <<Ատլետիկոն>> միակ գոլը խփեց հենց կենրոնից:
    2. Եզրային պաշտպանները, հատկապես Արբելոան, նաև կենտրոնում հանդես եկող խաղացողները, հաճախ էին սխալվում պարզագույն իրավիճակներում: Դրա փոխարեն <<Ատլետիկոն>> շատ ավելի վստահ էր գործում: Իլլրամենդիի խաղին հետևելով՝ շատ դժվար է հասկանալ, թե ինչի համար է <<Ռեալը>> շուրջ  40 միլիոն վճարել:
    3. <<Ռեալի>> աստղային հարձակվողները. նրանք գրեթե ոչինչ չկարողացան անել: Այս առումով հատկապես աչքի ընկավ Բենզեման:

    4. <<Ատլետիկոյի>> վստահ խաղը. Դիեգո Սիմեոնեի թիմը գիտեր, թե ինչ պետք է աներ, նրանք հստակորեն կատարեցին մարզչի հանձնարարությունները, օգտագործեցին մրցակցի սխալները և վստահ հաղթանակ տարան: Ատլետներն ապացուցեցին, որ ամենևին էլ պատահական չէին իրենց մեկնարկային 6 հաղթանակները. իսկ Կոստա-Ռոնալդո մենամարտում միանշանակորեն հաղթեց բրազիլացին: 

ՊՍԺ 1-1 Մոնակո

    Շատ ակտիվ սկսելով՝ փարիզեցիները արդեն 5-րդ րոպեին բացեցին խաղի հաշիվը։ Մաքսվելի եզրային փոխանցումը եզրափակեց երկար ոտքեր ունեցող Իբրահիմովիչը։ Շարունակելով ակտիվ գրոհելը՝ Լորան Բլանի տղաները սկսեցին արագորեն ակնառու դարձնել «մոնեգասկեցիների» պաշտպանության բացերը ու կենտրոնականների դանդաղությունը․ Աբիդալ-Կարվալյո զույգը հաջորդ մրցաշրջանում դժվար թե բավարարի Կլաոուդիո Ռանիերիին, եթե թիմը պատրաստվում է լրջորեն ներխուժել եվրոգավաթներ։
    Թեև 15-րդ րոպեից Տիագո Սիլվայից զրկվելով՝ նույնպես սկսեց զգալ խնդիրներ պաշտպանվելիս: Խաղալով 3 նոմինալ հենակետայիններով՝ գործի վրա ստացվում էր այնպես, որ երեքն էլ միտված էին հարձակման, ու պաշտպանությունը մնում էր կտրված։ Եվ ընդհամենը 20-րդ րոպեին Ժոաո Մոուտինյոյի ու Ֆալկաոյի ջանքերով հաշիվն արդեն 1-1 էր։

    Բավական դիտարժան հանդիպումը որոշ առումով պատասխանեց այն հարցին, թե արդյոք Մոնակոյի ծախսած գումարները արդյունավետ են։ Ռանիերին կարողացել է կառուցել շատ կայուն թիմ, որը պատրաստ է ՊՍԺ-ի հետ հավասար պայքարել Լիգա 1-ի չեմպիոնության համար։
    Իսկ փարիզեցիները արդեն իսկ հանդիսանում են հզոր ակումբ, որին պակասում է միայն եվրոպական հաջողություն գերհզոր դառնալու ճանապարհին։ Միակ լուրջ խնդիրը Կավանիին ճիշտ օգտագործելու խնդիրն է, քանի որ խաղացնել ուրուգվայցուն եզրից խաղացնելը պարզապես սպանում է վերջինիս գոլ խփելու պոտենցիալը։

                   <<Սպարտակ>>-<<ԲԿՄԱ>>  3-0. Սպարտակը կդառնա՞ չեմպիոն


    Երբ Մոսկվայի <<Սպարտակը>> սեփական հարկի տակ  պարտվեց շվեյցարական համեստ <<Սենտ Գալլեն>> ակումբին, շատերը նշում էին, որ գլխավոր մարզիչ Կարպինն արդեն սպառել է իրեն և որ վերջինիս գլխավորությամբ Մոսկովան ներկայացնող թիմը լուրջ հաջողությունների հասնել չի կարող:  Եվ իրոք, այդ պարտությունից հետո Պրեմիեր լիգայում <<Սպարտակի>> անցկացրած երկու-երեք հանդիպումները մեծ հաշվով  դրական հեռանակար չէին խոստանում. Սկզբում պարտություն չափանիշներով համեստ Պերմի <<Ամկարի>> դեմ խաղում, ապա երկու անվստահ հաղթանակ: Սակայն այսորվա խաղում պատկերը բոլորովին այլ էր. կարծես խաղադախտում այլ թիմ լիներ: Չնայած, որ մրցակիցն անհամեմատ հզոր Էր, <<Սպարտակի>> խաղացողները համակարգված էին գործում, ողջ խաղի ընթացքում տիրեցին տարածքային առավելությանը, մրցակցին գերազանցեցին նաև դարպասին կատարած հարվածների և կատարված ճժգրիտ փոխանցումների թվով: արդյունքն էլ եղավ այն, որ առաջին խաղակեսի վերջնամասում Օզբիլիսը բացեց հաշիվը՝ ուրախություն պարգևելով բոլորիս: <<Սպարտակը>> նույն ոգով շարունակեց նաև երկրորդ կեսում՝ արդյունքում տանելով գերվստահ հաղթանակ:
                                                                   

 
    Այս խաղում հաղթելով՝ Մոսկովյան ակումբը հստակ պատասխան տվեց մի քանի հարցերի. նախ՝ փշրվեց այն կարծիքը, որ <<Սպարտակը>> չեմպիոնության համար պայքարել չի կարող: Երկրորդ. Կարպինն ապացուցեց, որ դեռևս թիմում անելիք ունի:
   Վերջում պատասխանելով հարց-վերնագրին՝ պարզապես նշենք, որ թիմը իր կազմով, ֆուտբոլիստների խաղակցվածությամբ ու մարզավիճակով չի զիջում առաջնության ոչ մի թիմի և այսօր էլ հաղթեց չեմպիոնության հիմնական հավակնորդին. հետևություններն արեք ինքներդ...
    

Շալկե 0-4 Բավարիա․ Շվայնշտայգերը վերադարձավ

    Չելսիի դեմ սուպերգավաթային հանդիպումից հետո վերջապես ունեցանք հնարավորություն դիտելու մյունխենցիների մասնակցությամբ կենտրոնական հանդիպում՝ Շալկե 04 - Բավարիա խորագրով։

    Առաջին րոպեներից վստահորեն գնդակին տիրելով՝ Գվարդիոլայի սաները սկսեցին խաղալ այն խաղը, որը հենց սպասում են մյունխենյան ակումբի երկրպագուները իրենց թիմի կատալոնացի մարզչից։ Անթիվ անհամար փոխանցումներ, որոնք տարբերվում են Բարսելոնայի խաղից նրանով, որ այդ փոխանցումները ուղղված են հիմնականում առաջ, միտված են եզրերի հաճախակի փոփոխման, իսկ հարվածների առատությունը կարելի է կապել բավարացիների հարվածային միջին գծի հետ, որտեղ ամեն մեկն ունի թնդանոթային հարված ու կարող է անակնկալի բերել ցանկացած դարպասապահի։ 

    Շալկեն էլ, բազմաթիվ երկրպագուների ակտիվությամբ առաջ մղվելով, առաջին խաղակեսում արդեն ցույց տվեց, որ պաշտպանության կենտրոնում խնդիրները ահռելի են։ Իսկ գելզենկիրխեցիների բավական որակյալ հարձակումը՝ ի դեմս Ֆառֆան, Դրաքսլեր, Բոատենգ եռյակի ու մաքուր հարձակվող Ադամ Սալայի, գործում է մնացած թիմից անկախ ու շատ հաճախ հարձակման թափը չի բավականացնում։

    Եթե վերադառնանք Բավարիային ու Գվարդիոլայի կատարած աշխատանքին, չի կարելի չգնահատել բավարացիների հենակետային գոտու անթերի խաղը։ Շարքային վատորակ հայ մեկնաբանների լեզվով ասած՝ «Այսպիսի լարված խաղում կհաղթի այն թիմը, որը կհաղթի դաշտի կենտրոնը»։ Այսօր դա, անտարակույս, Բավարիան էր՝ շնորհիվ Լամ-Շվայնշտայգեր տանդեմի։ Նոմինալ աջ պաշտպան Լամը, կարծես համակերպվել է այն մտքի հետ, որ Պեպն իրեն տեսնում է հենակետայինի դիրքում, ու որոշ չափով արդեն հարմարվել է իր ֆիրմային բարձրից փոխանցումները ոչ թե եզրից, այլ ավելի խորքից կատարելուն։ Ցանկացած թիմ էլ կցանկանար դաշտի կենտրոնում ունենալ Լամի նման մեկին, ով, գնդակը լիովին վերահսկելուց բացի, գերազանց կերպով է հանձն առել խաղարկողի դերը։

   Վնասվածքից հետո մեկնարկային կազմում առաջին անգամ հայտնված Շվայնին էլ պարզապես հիացրեց իր կատարած աշխատանքի ծավալով՝ ապացուցելով, որ աշխարհի լավագույն հենակետայիններից է, եթե ոչ լավագույնը։ Բաստիանի հայտնվելը խաղադաշտում վստահություն ներշնչեց ողջ թիմին, ու չունենալով վտանգավոր հակագրոհ բաց թողնելու վախ՝ Տոնի Կրոոսը ստացավ հնարավորություն ակտիվորեն մասնակցել յուրաքանչյուր գրոհի ու շատ հաճախ հայտնվել հարվածային դիրքերում։ Չափազանց ուրախացրեց, որ բավարացիների հենց 31 համարը բացեց խաղի հաշիվը, իսկ 2 րոպե անց Մանջուկիչի խփած գոլը հաշիվը դարձրեց 0-2 ու հնարավորություն տվեց Գվարդիոլայի սաներին հանդարտեցնել խաղն։ Խաղավերջում էլ Ռիբերին ու Պիսարրոն ձևակերպեցին վերջնական հաշիվը՝ 0-4, ու Բավարիան հանգիստ վաստակեց հերթական 3 միավորը՝ հավասարվելով Դորտմունդցիներին։

ՍՈՒՈՆՍԻ ՍԻԹԻ

ՍՈՒՈՆՍԻ ՍԻԹԻ՝
ԱՊԼ-ի մաշտաբով շարքային սուպեր ակումբ՝ չափազանց որակյալ ու գիտակցված փոխանցումներով հագեցած ֆուտբոլ ցուցադրող համակարգ։ Միխաել Լաուդրուպը, գլխավորելով ուելսյալ ակումբը, չքանդեց Բրենդան Ռոջերսի ստեղծած խաղը, այլ ավելացրեց խաղի արագությունը՝ նվազեցնելով փոխանցումների քանակը։ Որպես արդյունք՝ նվաճված գավաթ և Անգլիայի առաջնության ամուր միջակի կարգավիճակ։ Քիչ տարբերություններ կան այս թիմի ու մի քանի մրցաշրջան առաջվա Նյուքասլի միջև․ 11 հոգանոց կայուն կազմ, փոխարինողների սուղ կազմ, 2 բարձրակարգ հարձակվող ի դեմս Միչուի և Բոնիի, բարձրակարգ հոլանդացի դարպասապահ։ Մնում է հուսալ, որ Լաուդրուպը չի կրկնի Ալան Պարդյուի սխալները, և «կարապները» մրցաշարային աղյուսակով կշարժվեն միայն դեպի վեր։

Միևնույն է «Բարսելոնան» հաղթեց. Բարսա 3-2 Սևիլիա

«Բարսելոնան» հյուրընկալել էր «Սևիլյային» և արդեն 36-րդ րոպեին Ադրիանո-Ալվեշ բրազիլական զույգը բացեց խաղի հաշիվը։ Մեսսի-Ֆաբրեգաս-Նեյմար-ՄԵՍՍԻ, և հաշիվը դարձավ 2-0։ Հանդիպման 80-րդ րոպեին հաշիվը կրճատեց Ռակիտիչը, 90-ին Կոկեն հավասարեցրեց, սակայն հյուրերին այս խաղում չհաջողվեց միավոր վաստակել․ 90+3 րոպեին Մեսսի փայլուն խաղի շնորհիվ գոլի հեղինակ դարձավ Ալեքսիս Սանչեսը:

Դերբի դ'Իտալիա՝ Ինտեր 1-1 Յուվենտուս․ Վալտեր Մացցարրի

    Չափազանց դիտարժան հանդիպումը ավարտվեց 1-1 հաշվով։ Ողջ խաղի ընթացքում թիմերը մտածում էին միայն գրահների մասին՝ պաշտպանվելիս էլ պահպանելով իտալական ֆուտբոլի լավագույն ավանդույթները։ Պետք է նշել, որ Ինտերը ոչ մի ասպեկտում չզիջեց իր ավելի զորեղ մրցակցին։ Առհասարակ, նախորդ մրցաշրջանի հետ համեմատելիս, պարզապես ապշեցնում է միլանյան ակումբի ֆուտբոլիստների փոխըմբռնումը։ Պարզապես ծափահարել կարելի է Վալտեր Մացցարրիի կատարած աշխատանքին։ Ա սերիայի համար դասական դարձաց 5 պաշտպանով խաղը ոչնչով չի տարբերվում մինչ այս ամառ Նապոլիում ստեղծած խաղաոճից։ Ինչպես Նապոլիում «առաջին ջութակի» դերը կատարում էր Համշիկը, այդպես էլ Ինտերում կա առաջատար կիսապաշտպան՝ ի դեմս Ֆրեդի Գուարինի, ով պատասխանում է գրոհների կազմակերպման համար։ Հիացնում է նաև փոխանցումների մտացվածությունն ու եզրային հարձակվողների ագրեսիվությունը։ Մինչև հաջորդ ամառ Կամբիասոն նման կայուն խաղի պայմանում  կարող է հեշտությամբ ետ գրավել Արգենտինայի հավաքականում իր տեղը։

    Մնում է հուսալ, որ Ինտերի ղեկավարությունը՝ Մասսիմո Մորատտիի գլխավորությամբ, կցուցաբերի խելամտություն և այս մրցաշրջանում չի դնի լուրջ պահանջներ Վալտեր Մացցարիի առաջ՝ թողնելով իտալացի մասնագետին առանց ավելորդ շտապողականության կատարել իր աշխատանքը՝ չափազանց մարտունակ թիմ կառուցելով ու Ինտերին գրանդ թիմերին շարքերը վերադարձնելով։

Աանգլիական գրանդերի նորեկները․ Ֆելլաինի․ Օզիլ․ Էրիկսեն

    Հավաքականների խաղերի հետ կապված ընդմիջումից հետո թիմերը վերադարձան տրանսֆերային վերջին օրերի ձեռքբերումները երկրպագուներին ցուցադրելու։ Առաջինը հերթը Յունայթեդի նորեկ Մարուան Ֆելլաինիին էր։ Բելգիացին դաշտ դուրս եկավ հանդիպման 62-րդ րոպեին։ Աչքի ընկնելով ակտիվ գործողություններով՝ Ֆելլաինին չկարողացավ փայլել, և պարզ երևում էր, ով կիսապաշտպանը դեռևս չի հասկանում խաղադաշտում իր դիրքը։ Համենայն դեպս բելգիացին ցույց տվեց, որ իր խաղով շատ կօգնի «մանկունյանցիներին» և կապահովի կիսապաշտպանությունում բազմաշերտայնություն։ Գրոհ կազմակերպելու կարողությունը կարող է Ֆելլաինիին տեղ ապահովել հիմնական կազմում թե՛ հենակետայինի, թե՛ փլեյ-մեյքերի դիրքում՝ Ռունիին կենտրոնացնելով մրցակցի դարպասի կողմը։ Ընդհանուր առմամբ բելգիացու խաղը ուրախացրեց, բայց լուրջ գնահատականի համար դեռ շատ վաղ է։ Հուսանք, որ հաջորդ տուրում մանչեստերյան դերբիի շրջանակներում Ֆելլաինին կցուցադրի իր ողջ պոտենցիալը։
    Հյուսիս-լոնդոնյան ակումբների երկրպագուները նույնպես դժգոհելու տեղիք չունեն․ Սանդերլենդ-Արսենալ խաղում առաջին րոպեներից դաշտ էր դուրս եկել Մեսութ Օզիլը։ Արսենալի 11 համարից պահանջվեց ընդհամենը 11 րոպե գոլային գրոհ կազմակերպելու համար։ Վերջին խաղերում գերազանց դիպուկություն ցուցադրող Օլիվյե Ժիրուն էլ հեշտությամբ եզրափակեց գերմանացու դինամիկ փոխանցումը։ Կասկածից վեր է, որ Օզիլը միայն կուժեղացնի Վենգերի թիմը, սակայն Վիլշիրի, Կազորլայի, Արտետայի, Ռեմսիի պես կիսապաշտպաններ ունենալով՝ վճարել 50 միլիոն ևս մի կիսապաշտպանի դիմաց, ով հեռու է գոլ խփելուց՝ հարձակման կենտրոնում ընդհամենը մի Ժիրու ունենալով։
    Թոթթեհեմի հիմնական կազմում էլ մի շարք նորեկներից խաղը առավել հաջող ստացվեց հատկապես Էրիկսենի և Պաուլինյոի համար, որոնք, մեկական անգամ գոլային փոխանցում կատարելով Գիլֆի Սիգուրդսոնին, Վիլլաշ-Բոաշի թիմին վստահ հաղթանակ պարգևելով։

ԵՎՐՈ-2016

    Չի կարելի ավարտված համարել աշխարհի 2014 թ․-ի ընտրական փուլը, սակայն պետք է փաստել, որ Եվրոպայի գալիք առաջնությունում մեր ազգային թիմի հայտնվելու հնարավորությունները շատ ավելի մեծ են լինելու, քանի որ վերջապես, մի քանի տարի համեմատաբար հաջող խաղերի արդյունքում, մեր թիմը հայտնվեց 4-րդ զամբյուղում, ինչը ապահովում է նախընտրական խմբում առնվազն 2 թույլ մրցակցի առկայություն։ 24 ուղեգրերից մեկը կազմակերպիչ Ֆրանսիայինն է, մնացյալ 23-ի համար կպայքարեն 53 երկիր։

    Վիճակահանությունը տեղի կունենա 2014-ի փետրվարին Նիցայում։
    Ահա՛ և ձևավորված 6 զամբյուղները՝

1-ին զամբյուղ

1	Գերմանիա	21,202
2	Իսպանիա	19,580
3	Իտալիա	19,395
4	Հոլանդիա	19,171
5	Հունաստան	17,593
6	Պորտուգալիա	17,394
7	Բելգիա	17,321
8	Ռուսաստան	17,306
9	Անգլիա	17,241

2-րդ զամբյուղ

10	Բոսնիա	16,943
11	Շվեդիա	16,844
12	Խորվաթիա	16,741
13	Ուկրաինա	15,434
14	Շվեյցարիա	15,356
15	Հունգարիա	14,801
16	Դանիա	14,544
17	Մոնտենեգրո	13,951
18	Թուրքիա	13,732

3-րդ զամբյուղ

19	Նորվեգիա	13,638
20	Իռլանդիա	13,481
21	Ավստրիա	13,351
22	Իսրայել	13,321
23	Ռումինիա	13,261
24	Չեխիա	13,222
25	Սերբիա	13,071
26	Լեհաստան	13,027
27	Սլովակիա	13,011

4-րդ զամբյուղ

28	Սլովենիա	12,861
29	Հայաստան	12,281
30	Ֆինլանդիա	11,976
31	Բուլղարիա	11,666
32	Շոտլանդիա	11,418
33	Իսլանդիա	11,301
34	Ալբանիա	10,910
35	Էստոնիա	10,809
36	Լատվիա	10,011

5-րդ զամբյուղ

37	Բելառուս	9,910
38	Վրաստան	9,855
39	Ուելս	9,560
40	Լիտվա	9,478
41	Մակեդոնիա	9,460
42	Հս. Իռլանդիա	9,241
43	Մոլդովա	8,740
44	Ադրբեջան	8,320
45	Լյուքսեմբուրգ	7,980

6-րդ զամբյուղ

46	Ղազախստան	7,160
47	Կիպրոս	6,958
48	Լիխտենշտեյն	6,505
49	Մալթա	6,150
50	Ֆարերներ	5,360
51	Անդորրա	4,480
52	Սան Մարինո	3,830
53	Ջիբրալթար	-